నమన్‌ ధీర్‌ అద్భుతమైన ప్లేయర్‌.. జట్టు ఏం కోరుకుంటుందో అతడికి తెలుసు: కోటక్‌

భారత యువ ఆల్‌రౌండర్‌ నమన్‌ ధీర్‌పై బ్యాటింగ్‌ కోచ్‌ సితాన్షు కోటక్‌ ప్రశంసలు కురిపించాడు. జట్టులో తన పాత్ర ఏంటో అతడికి స్పష్టంగా తెలుసని, అందుకు తగ్గట్టుగానే రాణిస్తున్నాడని అన్నాడు. బౌలింగ్‌, ఫీల్డింగ్‌తో పాటు చివర్లో వేగంగా పరుగులు సాధించగల సామర్థ్యం అతడికి ఉందని, ఇది జట్టుకు సమతూకాన్ని ఇస్తుందని పేర్కొన్నాడు.

న్యూజిలాండ్‌తో జరిగిన తొలి టీ20లో భారత్‌ నాలుగు వికెట్ల తేడాతో విజయం సాధించడంలో నమన్‌ కీలక పాత్ర పోషించిన విషయం తెలిసిందే. 226 పరుగుల భారీ లక్ష్య ఛేదనలో కేవలం 15 బంతుల్లోనే అజేయంగా 42 పరుగులు చేసి జట్టును గెలిపించాడు. మరో రెండు బంతులు మిగిలి ఉండగానే భారత్‌ లక్ష్యాన్ని చేరుకుంది. టీ20ల్లో భారత్‌కు ఇదే అత్యధిక లక్ష్య ఛేదన కావడం విశేషం.

ఈ మ్యాచ్‌ నేపథ్యంలో మీడియాతో మాట్లాడిన కోటక్‌.. నమన్‌ ప్రతిభపై విశ్వాసం వ్యక్తం చేశాడు. గత మ్యాచ్‌లో చివరి ఆరు నుంచి ఎనిమిది బంతుల్లో అతడు ఆడిన తీరు తన సామర్థ్యానికి నిదర్శనమని అన్నాడు.

“నమన్‌ చాలా ఆసక్తికరమైన ప్రతిభావంతుడు. అతడు పవర్‌ఫుల్‌ ఆటగాడు. జట్టు తన నుంచి ఏం ఆశిస్తుందో తెలుసు. దానికి తగ్గట్టుగానే ఆడుతున్నాడు. ఇది చాలా మంచి సంకేతం” అని కోటక్‌ పేర్కొన్నాడు.

ప్రత్యర్థి జట్టులో ఎడమచేతి వాటం బ్యాటర్లు ఎక్కువగా ఉంటే నమన్‌తో నాలుగు ఓవర్లు బౌలింగ్‌ చేయించవచ్చని, ఎడమ, కుడిచేతి వాటం బ్యాటర్లు సమానంగా ఉంటే ఒకటి లేదా రెండు ఓవర్లు వేయించవచ్చని వివరించాడు. మంచి ఫీల్డర్‌గా, ఫినిషర్‌గా కూడా అతడు జట్టుకు ఉపయోగపడతాడన్నాడు. బ్యాటింగ్‌లో అతడి టెక్నిక్‌, క్రీజులో నిలదొక్కుకునే విధానం, పవర్‌, షార్ట్‌ బాల్స్‌ను ఎదుర్కొనే తీరు ఆకట్టుకుంటున్నాయని చెప్పాడు.

తొలి మ్యాచ్‌లో సంజూ శాంసన్‌ 33 బంతుల్లో 67 పరుగులు చేయగా, అభిషేక్‌ శర్మతో కలిసి పవర్‌ప్లేలోనే 93 పరుగుల భాగస్వామ్యాన్ని నెలకొల్పాడు. కెప్టెన్‌ శ్రేయస్‌ అయ్యర్‌ 28 బంతుల్లో 42 పరుగులు చేశాడు. ఒత్తిడిలోనూ భయం లేకుండా సంజూ, అభిషేక్‌ ఆడిన తీరు తనను ఆకట్టుకుందని కోటక్‌ తెలిపాడు.

వరుసగా రెండు మ్యాచ్‌ల్లో త్వరగా ఔటైతే, మూడో మ్యాచ్‌లోనూ వికెట్‌ కోల్పోతానేమోనన్న భయం బ్యాటర్లలో ఉండవచ్చని చెప్పాడు. అయినప్పటికీ సంజూ, అభిషేక్‌ దూకుడుగా ఆడుతూ తమ ఆటపై నియంత్రణ చూపిస్తున్నారని ప్రశంసించాడు.

ఇదిలా ఉండగా, గజ్జల్లో గాయం కారణంగా ఇషాన్‌ కిషన్‌ రెండో టీ20కి దూరమయ్యాడు. దీంతో 15 ఏళ్ల యువ ఓపెనర్‌ వైభవ్‌ సూర్యవంశీ తుది జట్టులోకి వచ్చే అవకాశాలు ఉన్నట్లు అంచనాలు వెలువడుతున్నాయి. అయితే, అతడికి ఎప్పుడు అవకాశం ఇవ్వాలనే అంశంపై కోటక్‌ స్పష్టమైన హామీ ఇవ్వలేదు.

వైభవ్‌పై తొలి నుంచే ఎక్కువ అంచనాలు పెట్టడం మంచిది కాదని కోటక్‌ అభిప్రాయపడ్డారు. “అతడు చాలా ప్రతిభావంతుడు. భవిష్యత్తు ఉజ్వలంగా ఉంది. కానీ అందరూ అతడిని ఇష్టపడుతున్నారని, ఆడించాలని కోరుకుంటున్నారని తుది జట్టులో మార్పులు చేయలేం. జట్టులో ఆడే 11 మందినే ఎంపిక చేయాలి” అని అన్నారు.

ప్రారంభంలో వైభవ్‌ ఆడాలంటూ వచ్చిన హైప్‌ యువ ఆటగాడిపై అనవసర ఒత్తిడి పెంచిందని చెప్పాడు. ప్రస్తుతం అతడు మరింత పరిణతి సాధించాడని, జట్టులోని పోటీని అర్థం చేసుకుంటున్నాడని తెలిపాడు. ఫీల్డింగ్‌, ఫిట్‌నెస్‌, బ్యాటింగ్‌పై కృషి చేస్తున్నాడని, సీనియర్‌ ఆటగాళ్లు ఎలా ఆడుతున్నారో గమనిస్తూ నేర్చుకుంటున్నాడని వివరించాడు.

వైభవ్‌ సహజమైన దూకుడును మార్చే ఉద్దేశం తనకు లేదని కోటక్‌ స్పష్టం చేశాడు. బంతి పరిస్థితిని బట్టి ఏ షాట్లు ఆడాలో తెలుసుకోవడంపై అతడితో చర్చించినట్లు తెలిపాడు. బంతి ఎక్కడ పడినా షాట్లు సృష్టించేందుకు ప్రయత్నించే ఆటగాళ్లకు భిన్నంగా, వైభవ్‌ తనకు అనుకూలంగా ఆటను శాసిస్తూ షాట్లు ఆడగలడని ప్రశంసించాడు.